العراق الغالي _____للشاعر عباس جيجان

منتا وحيد انته الشعب كله بشيعته وسنته
منهو الي كالك ناسيك هم ينسى الكمر وكته
لو نبض القلب يتنكر بدكته
بس عشقك عشق مفضوح
وعشق الناس كله مساتر وسكته
صرت انته سبت وبركبة يهودي
هم شايف يهودي يجوز من سبته
انته الفارس الي يسبق هبوب الريح
وما ظن خيل سابقته وانته الي ترابك يرهم كحل للعين
ودوه للما شفت علته ومن طينك نحني كفوف المعرسين
وكل اصبع فرح من طينتك طكته وانته ريحة ترابك ترد الروح
هيل وزعفران وعنبر بشمته
ومثل تراب كاعك ما لكينة تراب يرهم للصلاة من طينته تربته
انته الي ينام بيك المصطفى الكرار التلوذ الناس كله بشارته وبخته
وانت الي ينام بيك بكربلاء حسين ال ما بايع لطاغي ودنك ركبته
وانته الي ضلت بيك شارة العباس لمن طاح دنكله الفرات وباسه من شفته
من طلعت منك يوم طرن البن كلبي وياي ما جبته
اثاريني نسيته هناك عندك كلبي امنته
شتلته بجرف دجلة الخير وي سباح الشواطي شربكت بته
وامتدت عروكه بوسط ذيج الكاع وبماي الفرات ودجلة عمدته
ولمن صار ينكل جتمه بين الناس اخذته وياي للكاظم على الشباك زورته
صح هسة اتاقلمت وصرت من وطن نيدر لاند هولندي الهوية وشعري جللته
وصح اتقلمت وي الغرب فد نوب وصرت ماصخ مثلهم والملح عفته
وصح كمت ارطن رطنهم لمن يرطنون ولسان العرب بالاعجمي كسرته
بس مدري شيصير بيه لمن يمر طاريك احسنك دفو تموز وشطته
واثاريني مثل نبع النخل لو طال يرجع للاصول وتنحي شعفته
العالم نسه يوم 11 من ايلول صارت بيك سالفته
ناس تكول لازم نحتويه ونشفط البترول ونعوض الراح ونسرك بركته
وناس تكول لازم هل الحصار يدوم
وناس تكول لازم ننزع اسلحته
وناس تكول خطية ذولة اطفاله ماتوا من الجوع
وناس تكول حيل وياه ما حمد ربه وشاكر نعمته
وانته بين هذا وذاك صاير شبح للايرمون
ويا هو الي طاح كمت وسددت فكته جي
لانك حلو والدول منك تغار ما عدهم من مجد نلته انته
اول وطن آدم وضع جسمه عليه وكال يا الله ولانك وصله من جسمه
وانته اول وطن حبه النبي ابراهيم ودعا ربه يصونه برحمته وعزته
وانته اول وطن مرسى لسفينة نوح ونبي ايوب ناخت بيك راحلته
وانته اول وطن علم العالم ابجدية ويكتب التاريخ
وانته اول وطن قانون سننته
وانته اول وطن ما تشبه الاوطان
مدري شلون ربك خالقك سبحان ربي شلون صورته
صورته العراق وعلينة يلوك واحنه نلوكله لمن يحن وكته

البارحة شفت الوطن بالطيف اجاني البارحه ..
قتله هلا ومية هلا يابو الخيول الجامحه ..
مديت اديه تسالمه شفت القلب قبل الجفوف يصافحه ....
شلونك قلت ياموطني وظنوني ظلت سارحه ..
وانقطع وسطي من الخجل من الخجل وعيوني ظلت شابحه ..
قال اطمأن ياولدي كفتنا هي الراجحه ..
قلته الْيِرد ياموطني لحضنك الدافي تسامحه !! ..
قال اْليِرد وإلْما يِردْ وحتى الْيِفكر بالوطن ذنوبه كلهن طايحه ..
بس الْيِخون اُمّيِتهْ ما يستحق نقرا على روحه الفاتحه ..
قلته يبه ياموطني عندي حجي بغزر الدموع المالحه ..
قال احجي قول شما قلت طبع الوطن مثل الابو واجب عليك تصارحه ..
قتله يبه ياموطني ليش انت من دول الدول صاحت عليك الصايحه ؟؟
وليش انت من دون الدول اطفالك الحلوين بالدم سابحه ؟؟
وليش انت من دون الدول بكل بيت عندك نايحه ؟؟
وليش انت من دون الدول ناسك إتْصبّح نازحه ؟؟
وليش انت من دون الدول جيرانه كلها تواقحه ؟؟
وليش انت من دون الدول يا ثور بالعالم قوي تركض عليه تناطحه ؟؟
متْقلي منهو الْخبلك يا بو العقول الراجحه !! ..
شفته ضحك .. شفته ابتسم لمن حِجى و جاوب اجابه واضحه ..
قال اعتقد يا ولدي .. المشكله مو بالوطن .. المشكله بالحجاج هو الذابحه ..
يبقى الوطن هو الاصل والناس هي الرايحه ..
كفكف دموعك ياولد ادري بغريب الدار شوقه الجارحه ..
وادري بغريب الدار كل ما يِعتلي وكل ما صعد وشْما كسب خسران كل ما رابحه ..حتى الطيور إلها وطن تهاجر لجل لمن يهزها الشوق ترجع طافحه ..
وحتى النخيل إلها وطن ما تنشتل إلا بأرضنا المالحه ..
بس إحنا نبقى لِشْ وقت يا موطني نحلم وطنا نصافحه ؟؟ ..
وخلاف الوطن تبقى البشر مثل البهايم دايحه ..
والبارحه شفت الوطن بالطيف أجاني البارحه

اللهم احفظ العراق والعراقيين*

a1

شكرا يا وردة على هذة الشعر اني بنسبه الي كل قصايد عباس جيجان حافضتها لان كلش احب قصايدة لان رووووووووووعه مثلك يا امه الله a1 قلوب

الله الله ابداع
شكرا لك يالغلا

o7

» قصيده رائعه للشاعر عباس جيجان
» اهلا وسهلا بكم في منتديات زهور العراق
» لرسم علم العراق العظيم بالمسنجر كالياهوو او غيره